羅拔仔退隊波蘭有難
世界盃外圍賽歐洲區I組矚目大戰，英格蘭主場對波蘭。「神箭」羅拔利雲度夫斯基受傷退隊，對波蘭影響之大真係計數機都計唔掂，預計英格蘭可以盡情搶攻。事實上，「三獅兵團」以往對住波蘭都好搶韁，近9次交手有7次半場領先，踢法格食格，今場一於捧英格蘭半場主勝。（香港開電視77台、有線601及661台周四凌晨2時45分直播）
羅拔利雲度夫斯基踏入2021年，各項賽事上陣20場攻入25球；近兩場世界盃外圍賽入咗3粒，累積入咗24球，喺歐洲球員之中僅次於30球嘅C朗，以及26球嘅舒夫真高，佢同時係波蘭史上「士哥王」，為國家隊射入66球，絕對係波蘭成敗嘅關鍵人物。
之前為咗令「羅拔仔」可以喺今場比賽上陣，驚動到波蘭總理莫拉維茨基，親自打電話畀德國總理默克爾，最終開綠燈通融「羅拔仔」嘅檢疫手續，容許佢由英國返回德國後，毋須隔離14日，先至令佢嘅所屬球會、德甲班霸拜仁慕尼黑放人。搞場咁嘅大龍鳳，就知波蘭上下都明白，呢場波冇咗「羅拔仔」對爭取出線實在非常不利，依家呢位箭頭受傷退隊，大軍仲受到疫情困擾，今仗可以話未踢先輸一半。
速戰速決乘機抖抖
「三獅兵團」愈踢愈順，佢哋先以半力出擊輕取聖馬力諾5比0，上場就有哈利卡尼1傳1射，以2比0作客擊敗阿爾巴利亞，預料今仗主場出擊，可以擊敗冇咗「羅拔仔」嘅波蘭。其實英格蘭近7次主場鬥波蘭錄得全勝，不過主Ｗ太熱冇肉食；翻查紀錄，原來英軍近9次鬥波蘭，有7次半場已經領先，一於信佢哋再一次早早搞掂波蘭，等領隊修夫基可以早啲畀班英超球星抖吓，同各大球會有交代，推介半場主勝。
足球推荐网为广大球迷朋友们提供该场赛事的基本面解读、近期战况、综合分析、赛事推荐等信息。找全方位的足球信息服务，上足球推荐网！
